Pista Catro leva a Rianxo os insectos xigantes do doutor Mezzo

O vindeiro 5 de setembro vai estar en Rianxo, no exterior do CEIP Castelao e para animar o serán de pequenos e maiores, o fabuloso circo de insectos xigantes do doutor Mezzo, a cargo da agrupación Pista Catro. Será ás 19.30 horas, organizado pola área de Cultura do Concello.


Mezzo, segundo informa este departamento, é un espectáculo itinerante de circo cheo de cor, imaxinación e fantasía, co que Pista Catro quere recuperar por unha banda o espírito de aventura das novelas de Julio Verne, e por outra banda a estética visual dos circos ambulantes de finais do século XIX e principios do XX. Haberá escenografía móbil, números circenses, personaxes fantásticos, música e participación directa do público.
Argumento
Giovanni di Mezzo, botánico, explorador e naturalista xenovés do século XIX, descubre unha illa no Océano Pacífico que alberga estrañas criaturas, descoñecidas especies de insectos xigantes da Era Mesozoica que sobreviviron á grande extinción. Ao regresar a Europa, o doutor Mezzo exhibe algunhas destas criaturas nunha feira ambulante no que se deu en chamar como O Fantástico Circo de Insectos Xigantes do Doutor Mezzo.
O aforo do espectáculo será limitado. Será preciso facer a reserva previa de localidades a través da sección de reservas da web municipal. O prazo remata ás 12:00 h do mércores 1 de setembro.