O vindeiro sábado 8 de agosto, ás 21:30 h no exterior no CEIP Castelao, o músico galego Óscar Ibañez, acompañado da súa Tribo, presentará o seu espectáculo Da Terra en Rianxo. O concerto abéirase ao programa Noites de Folc.
Óscar Ibáñez é un gaiteiro e frautista que realiza unha fusión musical sen límites partindo das raíces, a medio camiño entre investigación e creación, que ten como resultado un novo e único son. Na súa traxectoria como solista publicou os discos Alén do Mar (VIR, 2012) e Aires de Pontevedra (Inquedanzas Sonoras, 2017) alén doutros traballos de investigación como os libros-CD Os Montes de Lugo (Ouvirmos, 2007), O Quinteto Monterrey (Dos Acordes, 2009) ou Xoán Tilve Gaiteiro de Campañó (aCentral Folque, 2015).
A gran calidade da súa banda de directo foi recoñecida en máis de 200 concertos por toda a Península Ibérica, Bretaña e Italia participando nalgúns dos festivais internacionais máis importantes como: Festival Intercéltico de Lorient (Lorient, Bretaña); Festival Capodanno Céltico (Milán, Italia); Festival Internacional da Máscara Ibérica (Lisboa, Portugal) ou o Festival do Mundo Celta de Ortigueira (Ortigueira, Galicia), entre outros.
No espectáculo Da Terra percorre os temas máis destacados dos seus traballos Alén do Mar (baseado nas músicas de ida e volta Galicia-América do entre séculos XIX-XX) e Aires de Pontevedra (co que homenaxeou o célebre gaiteiro de Viascón Ricardo Portela no 25 aniversario do seu pasamento, co fin de contribuír á actualización, difusión e universalización da nosa música patrimonial).
Para este concerto a banda Óscar Ibáñez & Tribo estará integrada por excelentes músicos de longa e recoñecida traxectoria como Fernando Fraga (Carlos Núñez), acordeón; Harry.c (Milladoiro), violín; Carlos Calviño (Roi Casal), guitarra; Paco Dicenta (Mercedes Peón), baixo; e Carlos Castro (Fía na Roca), batería e percusión. No concerto colaboran ademais Pepe Romero, Jorge Maño, Adrián García, Álvaro Puga e Gloria Cespón (Banda de Gaitas Suevia), Daniel García e Álvaro Rúa (Banda de Gaitas Nova Era) e a xilofonista Carla Villanueva.
Este concerto forma parte da programación do Concello de Rianxo a través da Rede Cultural da Deputación da Coruña. Para asistir cómpre reservar a entrada en liña na web municipal de Rianxo.
