Os nosos concellos asinan un acordo en Rianxo para o posicionamento da Traslatio

Os concellos do sur do Barbanza deron este martes 3 de agosto un paso decisivo no seu impulso turístico en materia xacobea. O motivo? A formalización no Consistorio de Rianxo dun acordo asinado entre a Mancomunidade Barbanza Arousa e a Fundación Mar de Arousa Río Ulla. Participaron na rúbrica o presidente da mancomunidade (e rexedor rianxeiro), Adolfo Muiños, e o seu homólogo da fundación, Javier Sánchez-Agustino. O acordo busca a potenciación e a posta en valor da Traslatio.

Exif_JPEG_420

Neste acto tamén participaron José Ramón Romero, alcalde de Boiro; Patricia Lojo, concelleira de cultura da Pobra do Caramiñal; Ramón Doval, concelleiro de turismo de Ribeira; Fátima Cachafeiro e Patricia Miralles, xerente e técnica da Mancomunidade Barbanza Arousa, respectivamente; José Manuel Fernández, representante da Asociación Galega de Actividades Náuticas e integrantes do Club Náutico Deportivo de Barraña.

Segundo fixeron saber máis en detalle, o convenio é “un compromiso de colaboración para a posta en valor da travesía marítima que simboliza o traslado dos restos do Apóstolo cara a Santiago de Compostela, a denominada Traslatio”. Para este cometido, a mancomunidade incluirá no produto os portos de Barbanza Arousa para que dispoñan da información do proxecto e das cartillas náuticas que os visitantes poderán selar en cada un dos mesmos. Mediante a rúbrica nos portos deportivos e mariñas de Ribeira, A Pobra do Caramiñal, Barraña e Cabo de Cruz en Boiro e en Rianxo os visitantes e peregrinos obterán o diploma acreditativo da Traslatio no concello de Padrón.

Para a comercialización do proxecto, participa no mesmo a Asociación Galega de Actividades Náuticas (AGAN), que colaborará involucrando touroperadores náuticos con vistas á creación de paquetes e distribución dos mesmos.

Adolfo Muíños, presidente da Mancomunidade Barbanza Arousa, destaca a importancia do Camiño de Santiago neste territorio por ser a orixe da tradición xacobea e que é este o único destino no que se pode obter a Compostela por terra e por mar.