A Asociación Rianxeira de Empresarios vén de emitir un comunicado no que quere transmitir ao Concello as diversas queixas dos seus asociados a respecto do mercadiño ambulante (que se celebra na localidade os mércores e os domingos) e esixe “solucións inmediatas” ante este malestar. Segundo fai saber a ARE, o mercado é unha fonte de problemas “dende hai meses” para os negocios establecidos na praza de Castelao e os seus arredores, co inicio das obras realizadas no firme do Campo de Arriba. Así, indican, “o traslado á dita praza de tódolos comerciantes ambulantes que antes se instalaban no Campo de Arriba creou graves problemas de espazo que, aínda que nos meses en que as restricións da COVID non foron tan evidentes, provocan agora constantes incidencias e roces entre negocios locais e comerciantes ambulantes”.
E engaden: “Desde a ARE estamos a transmitir ao Concello, desde fai xa meses, queixas provenientes de varios negocios asociados que se están a ver afectados e, aínda que desde o Concello se nos indica que se van buscar solucións, estas non dan chegado. A apertura, nas últimas semanas, de dous novos negocios de hostalería na praza de Castelao e as súas proximidades veñen de facer aínda máis urxente a toma de medidas para corrixir a problemática existente por parte do Goberno local, ao verse estes dous locais gravemente afectados o pasado mércores, día en que a afluencia de comerciantes ambulantes ao mercadiño de Rianxo é maior”. Segundo indican, na dita xornada, un dos establecementos nin tan sequera puido montar a terraza e o outro viu como varios comerciantes ambulantes movían e apartaban as mesas que tiña montadas para colocar o seu posto”.
En palabras da ARE, estes incidentes agravan a xa de por si complexa situación na que vive a hostalería, “que está a padecer restricións importantes por mor da pandemia e, sen esquecer, que o verán está xa a rematar e os turistas que quedan marcharán en cuestión de días”.
A ARE, se ben recoñece que nas últimas conversas co Executivo local este comprometeuse a solucionar o problema o vindeiro domingo 29 (co traslado dos postos ao Campo de Arriba), desde a asociación queren “que a medida se axilice o máximo posible e que, ao mesmo tempo, se tomen outras medidas destinadas tanto a mellorar o mercadiño como a convivencia deste cos negocios locais”. Ademais, din que “é fundamental que o vindeiro mércores non se repita a situación que se viviu esta semana”.
Estas serían as medias solicitadas:
-Que se reinstalen no Campo de Arriba os postos que sexa preciso.
-Que se reinstalen na praza da Virxe de Guadalupe aqueles que sexa posible.
-Que se reinstalen os postos que sexa necesario nas rúas de Abaixo e do Medio.
-Que se permita a entrada na praza dos vehículos dos comerciantes ambulantes, única e exclusivamente, para a montaxe e a recollida dos postos.
-Que a distribución do mercadillo se faga conforme ao seguinte:
▪ Que ningún posto do mercadiño dificulte o paso dos viandantes polas beirarrúas da praza.
▪ Que ningún posto do mercadiño oculte escaparates ou entradas de negocios locais ou dificulte o
acceso aos mesmos dos clientes.
▪ Que ningún posto do mercadiño oculte ou invada o espazo reservado para as terrazas da
hostalería local asegurando sempre que se manteña a distancia suficiente, entre os postos e as
terrazas, para permitir o paso e o acceso ás mesmas incluso de persoas con mobilidade reducida
e pais e nais con carriños de bebés.
▪ Que ningún posto do mercadiño dificulte a entrada a vivendas e edificios residenciais así como
tampouco a outros edificios públicos asentados na praza de Castelao.
