O BNG de Ribeira publicou este 5 de agosto un comunicado a prol do sistema público de benestar ante “o anuncio do presidente do Goberno galego, Alberto Núñez Feijóo, sobre a construción dunha nova residencia no noso concello”. A formación nacionalista anunciou que vai solicitar á Consellaría de Política Social información detallada de como será a xestión dese novo modelo de residencia que anunciou o presidente.
O voceiro do BNG, Xosé Vázquez Cobas, cre que “é positivo que o Goberno galego anuncie a súa pretensión de realizar unha residencia de maiores en Ribeira”. E engade: “A proposta do Bloque pasa por facela no edificio Hesta Kurva das Saíñas porque suporía dar cumprimento a un acordo plenario impulsado polo BNG e que tivo o apoio unánime da Corporación Municipal”. Malia iso, Vázquez Cobas, cre que “hai que tomar con cautela o anuncio porque só foi iso, un anuncio sen máis detalle nin proxecto concreto”.
O voceiro nacionalista lamentou “os máis de 12 anos nos que a Xunta paralizou a construción de novas residencias públicas e non foi construída ningunha”. Ao seu xuízo, “é inaudito que non se fagan máis residencias cando o sistema de dependencia só chega ao 51% da poboación beneficiaria ou cando para acceder a unha praza pública hai que agardar dous anos”.
Na súa opinión, “a carencia de prazas públicas é evidente pero iso non pode ser desculpa para deixar que se fagan de calquera maneira e con calquera xestión. Cómpre lembrar que 8 de cada 10 prazas de residencias de maiores en Galiza son privadas. Esta situación fai visíbel o modelo residencial privatizado e mercantilizado polo que aposta o PP no que se converte o dereito á vellez digna nun negocio obxecto de lucro”.
