O BNG pide atallar os continuos ataques aos bancos LGBT de Ribeira, o máis recente o de Artes

O Bloque Nacionalista Galego de Ribeira emitiu un comunicado no que mostra a súa repulsa polos continuos ataques e actos vandálicos contra os bancos colocados por todo o municipio coas cores do colectivo LGBT, dando visibilidade á loita polos dereitos persoas. Segundo lembra a agrupación nacionalista, as novas accións vandálicas producíronse nos bancos de Olveira e Artes onde escribiron a palabra “enfermos”.

O concelleiro nacionalista, Luís Pérez Barral, lamenta que “esta non é a primeira acción homófoba que se rexistra neste concello pois xa houbo que repoñer o banco coas cores LGBT que os intolerantes romperon en Aguiño e tamén teñen vandalizado o banco de Palmeira”. E engade: “Como sociedade temos que facer unha reflexión no só para deixar claro que a violencia non pode ter cabida senón tamén para illar a quen emite e promove eses discursos de odio. Porque detrás do machismo, do racismo, da xenofobia, de fobia LGTB hai unha mesma raíz: a da intolerancia, á que hai que responder dicindo que eses discursos non teñen cabida na nosa sociedade”.

O concelleiro ribeirense cre que “non se deben tolerar este tipo de ataques porque agora só son unhas pintadas e insultos nun banco pero se este problema non se atalla, despois poden vir os insultos ou a violencia física como acontece noutros lugares contra as persoas do colectivo LGBT”. Pérez Barral considera que o Concello de Ribeira, ademais de restaurar todos os bancos, debe dar “un paso adiante para atallar estes ataques feitos por unha minoría covarde e intolerante”. Así, o BNG de Ribeira pediu ao Goberno local que se volva lucir a bandeira do orgullo LGBT na Casa Consistorial como “acto simbólico e de concienciación” e que “se fagan campañas de educación afectivo-sexual nas que se promova a tolerancia e o respecto cara ás persoas”.