O BNG quere amosar o seu firme apoio ao persoal da planta de reciclaxe de Servia, en Lousame. Os representantes do BNG en todas as localidades que forman parte da ‘Mancomunidade Serra do Barbanza’ coinciden en sinalar que “non se poden poñer en risco os postos de traballo dependentes da planta de reciclaxe” e tamén “na necesidade de que as diferentes administracións mostren implicación para que se acometan os investimentos necesarios para a mellora da planta.
A reivindicación do persoal da planta terá lugar o vindeiro domingo, partindo ás 11h do porto deportivo de Portosín e continuando ás 12h cunha manifestación que irá dende a igrexa de Noal ata o consistorio do municipio de Porto do Son.
Dende a formación nacionalista queren convidar a que toda a veciñanza mostre o apoio ao persoal laboral nunha cuestión que o BNG entende “prioritaria para un futuro sustentable na nosa área xeográfica”. O BNG insiste tamén “na necesidade de apostar por un modelo descentralizado e sustentable na xestión dos residuos como o que representa a planta de Servia”.
