O sector gandeiro conta xa cunha aplicación móbil creada de maneira específica para facilitar a xestión das explotacións e que ten, entre outras vantaxes, a de incrementar o seu potencial negociador respecto dos prezos do leite. A ferramenta foi dada a coñecer este 4 de agosto na Cidade da Cultura polo conselleiro de Medio Rural, José González, quen lembrou que xa se pode descargar a través da páxina web de seu, www.contalactea.gal. Foi desenvolvida por Medio Rural e a Fundación Juana de Vega.
Na súa intervención, o conselleiro destacou que con “esta ferramenta os produtores non só poderán calcular os seus custos de produción e así incrementar a súa rendibilidade, senón que poderán tamén mellorar esa posición nas negociacións dos prezos”. Trátase, engadiu González, “dunha aplicación posta á enteira disposición do sector para cubrir unha das necesidades detectadas a través da estratexia de dinamización do sector lácteo: a mellora da xestión económica das explotacións”.
O conselleiro explicou que esta ferramenta constitúe “un instrumento definitivo para que os gandeiros poidan defender, desde a mellor posición posíbel, os seus intereses, mellorando a súa posición dentro da cadea de valor da produción de leite”. Engadiu que se trata dunha ferramenta útil e efectiva para negociar os prezos e, en xeral, “para mellorar a xestión das explotacións, así como sinxela, intuitiva, accesíbel e manexábel por e para todos”.
