Mar presenta unha nova convocatoria de axudas para mellorar instalacións portuarias

A conselleira do Mar, Rosa Quintana, visitou na mañá deste 10 de agosto o porto de Fisterra para comprobar as melloras introducidas nos seus equipamentos nos últimos tempos e informar das axudas que ten o sector á súa disposición para seguir avanzando neste ámbito transformador. Alí Quintana lembrou que Mar aprobou este ano 55 proxectos presentados polas confrarías de pescadores para modernizar os portos, lonxas e lugares de desembarque.

O orzamento total destas iniciativas supera os 2,5 millóns de euros e con eles a Xunta leva investidos desde 2016 máis de 10 millóns de euros en achegas para máis de 330 actuacións deste tipo.

Quintana tamén fixo saber que a Xunta publicará esta mesma semana unha nova convocatoria de axudas para proxectos de innovación impulsados por organizacións de produtores da pesca (OPP), cooperativas, asociacións profesionais de persoas mariscadoras a pé, asociacións profesionais de redeiras e confrarías de pescadores. Serán 800.000 euros. Os proxectos a subvencionar poden selo ao 100% e deben ter entre os seus obxectivos mellorar a eficiencia enerxética das instalacións (modernizando os sistemas de iluminación) ou incorporar equipamentos que contribúan á protección do medio ambiente (proxectos de enerxía fotovoltaica nas instalacións destinados ao autoconsumo). Entre as finalidades das actuacións tamén está a mellora da seguridade e das condicións de traballo das persoas pescadoras, o incremento da calidade, do control e da rastrexabilidade dos produtos desembarcados e a modernización de infraestruturas portuarias pesqueiras mediante obras para crear novos espazos nos inmobles, adaptar os chans ou mellorar o seu illamento, entre outras.