O presidente do Goberno galego, Alberto Núñez Feijóo, visitou este martes 31 o Faro de Lariño, no concello de Carnota. Na súa visita, aproveitou para enxalzar o modelo de turismo galego: “Un turismo seguro e tranquilo como unha fortaleza e unha oportunidade para reactivar a economía e xerar emprego”.
Feijóo tamén salientou o grande esforzo feito durante o inverno e a primavera por parte de todos os galegos, “especialmente o sector turístico e hostaleiro”, para “que Galicia fose este verán unha das comunidades con mellor comportamento turístico de España”, sinalou, engadindo que estes vimbios fixeron realidade este ano un importante incremento no número de viaxeiros, do 81%, con respecto ás cifras acadadas o ano pasado.
O presidente da Xunta destacou tamén que o proxecto de converter o Faro de Lariño nun hotel singular supón “un exemplo máis dese turismo de calidade polo que aposta Galicia” e que, ademais, “pon en valor un recurso tan importante e tan icónico como son os faros”.
Feijóo abordou a oportunidade que suporía poder rehabilitar toda a arquitectura tradicional que existe no litoral galego e que é previa á Lei de Costas, como as conserveiras ou as fábricas de sagadura. “É unha proposta razoable que Galicia queira poñer en valor os centos de edificacións tradicionais da costa galega como recursos turísticos, hostaleiros e de restauración”, insistiu.
