O Concello de Boiro organiza este domingo 29 de agosto a estrea do documental Maraxe, unha produción de Pablo Chouza que conta os 40 anos de historia do Club de Remo de Cabo de Cruz. Na presentación do documental estiveron o alcalde, José Ramón Romero, a concelleira de Cultura, María Outeiral, e o concelleiro de Deportes, Marcos Fajardo.
Maraxe é un documental en galego do produtor Pablo Chouza no que interveñen veciños e veciñas persoas vencelladas ao Club de Remo de Cabo de Cruz. Na produción móstranse os 40 anos da historia do club, dende que se fundou ata a actualidade.
A estrea do documental vaise realizar este domingo 29 de agosto ás 21.30 horas en Cabo de Cruz, a carón da Lonxa, cunha proxección da produción. A capacidade para a proxección do documental é limitada e a reserva previa de entradas estará dispoñíbel dende este xoves na web municipal do Concello de Boiro.
