Este 27 de agosto abre as súas portas en Vilanova a Festa da Conserva

Vilanova de Arousa celebra a partir deste venres 27 (e até as 23.00 horas do domingo 29 de agosto, baixo estritas medidas de seguridade e hixiene), a segunda edición da Festa da Conserva, un evento que busca promover as conservas e produtos elaborados do mar estratéxicos para a economía de Galicia, recoñecendo “o saber facer dunha industria clave no desenvolvemento socioeconómico da nosa terra”.

A inauguración está prevista para as 13.00 horas do venres, cun acto institucional que contará coa presenza de Rosa Quintana, conselleira do Mar, Gonzalo Durán, alcalde de Vilanova, e Juan Vieites, secretario xeral de ANFACO-CECOPESCA, entidade co-impulsora deste evento xunto coa Consellería do Mar e o Fondo Europeo e Marítimo da Pesca (FEMP). Organiza o Concello.

Baixo o slogan Cata a Lata, a asociación empresarial ANFACO promocionará as conservas de peixe e marisco desde a súa caseta, situada nas proximidades do xardín Umbrío, fronte ao Consistorio, a través de degustacións da ampla variedade da oferta de peixe e marisco en conserva. Amais, celebrará unha demostración gastronómnica o domingo 29 de agosto ás 19:30 horas, que será desenvolvida polo chef Yayo Daporta.

Ademais, estas accións gastronómicas compleméntanse con actividades de divulgación co obxecto de informar as propiedades nutricionais e beneficios do consumo de peixe e de conservas, o papel da industria así como o traballo de ANFACO-CECOPESCA e o seu centro tecnolóxico.

Estarán presentes unha parte moi relevante das empresas asociadas, como Conserveira Gallega; Conservas Roma; Antonio Pérez Lafuente; Conservas Dardo; Conservas Antonio Alonso; Conservas Friscos; Pescados Rubén e Aceites Abril.