Na Pista do Canaveiro disputouse este domingo unha boa final entre César Vilasánchez (Ares-Ferrol) e o ribeirense Jorge Oujo, cunha clara vitoria para o xogador das rías altas.
Pese a que o xogador de Aguiño deu a cara en todos os xogos, non tivo sorte en ningún deles e cedeu por un 6-0/6-0 fronte a Vilasánchez.
Nas semifinais, o ribeirense apeaba do torneo ao xogador de Valga (Pontevedra) José Angel Méndez por 6-3/6-2, mentres o de Ares se desfacía de outro ribeirense: Carlos Lijó por un 6-0/6-2.
No torneo feminino, a boirense Laura Hermo vencía nun partido longuísimo e agónico á madrileña Noelia Redondo por 6-7/7-6/10-2. Polo camiño en semifinais cedían a viguesa Lucía Rodríguez e a boirense Irene Lago.
O torneo disputouse entre os polideportivos de Sirves, Artes, Palmeira e as pistas do Canaveiro, onde se xogou a final, e durou case que dúas semanas, contando con 24 xogadores e xogadoras chegados dende distintos lugares de Galicia.