A Coordinadora para o Estudo dos Mamíferos Mariños solicitou o peche do areal de Ornanda, en Porto do Son, polas malas prácticas levadas a cabo polos bañistas en relación ao arroaz Confi, cuxa presenza na ría de Muros e Noia converteuse xa é habitual. A solicitude pediuse malia os repetidos chamamentos da plataforma ambiental para que se deixe de acosar ao cetáceo, unhas prácticas que seguen a repetirse estes días e que non só achegan un risco potencial (e real) para a xente das praias que quere interactuar co mamífero, senón tamén para este, porque é un animal libre e salvaxe que pode ver alterados negativamente os seus hábitos por mor dun contacto excesivo co ser humano. As recomendacións da coordinadora téñense sumado ás dos membros de Protección Civil dos nosos concellos.
A respecto de todo o devandito e do escaso éxito que tiveron as recomendacións entre a cidadanía, a plataforma galega advirte o seguinte: “Diante deste comportamento incívico dunha parte do público a CEMMA adoptará unha serie de medidas escalonadas que van dende o local ao estatal, pois as competencias sobre o caso están divididas en función do uso da praia (concello), condicións do marisqueo (Xunta) ou competencias en materia de conservación de especies (Xunta e Estado)”.
Para a coordinadora, non hai dúbida de que se trata dun claro caso de acoso a un individuo dunha especie protexida, “con decenas e centos de persoas aproximándose na procura de contacto”, o que se suma “á rotura das recomendacións COVID onde esas persoas se congregan ao seu arredor sen respectar minimamente a distancia de seguridade nin máscara (medidas básicas COVID), o que pode contaxiar mesmo ao propio animal dado que é un mamífero e por tanto pode sufrir as mesmas enfermidades que os mamíferos terrestres”.
Ademais, a organización quere recordar que “os humanos que entran en contacto co arroaz tamén poden ser contaxiados de pneumonía e de enfermidades víricas epidérmicas, algunhas das cales foron xa comprobadas na pel do arroaz. Máis aínda cando o contacto cos humanos esta a provocar diversas feridas, sobre todo na cara e parte anterior do corpo, que poden agravas esta situación”.
E conclúe a plataforma: “Cada persoa que contacta fisicamente con Confi é un día menos da súa vida libre, a cada contacto perde o interese de voltar cos seus. Non se mantén o máis mínimo respecto cara ao cetáceo, a pesar das recomendacións visíbeis a través dos carteis que o concello ea CEMMA colocaron nos portos e praias”.
