Ao abeiro do programa Verán Cultural, vanse desenvolver estes días na Pobra dúas novas funcións de balde destinadas a público familiar. Por unha banda, no 31 de agosto, Cé Orquestra Pantasma aposta pola recuperación da figura do home orquestra cun espectáculo de música de rúa cheo de forza, ritmo e fantasía, onde o público pasa a converterse en protagonista.
Xa abrindo o mes de setembro será a quenda de Moc Moc-Santimbanqui con Directo ó corazón, no día 3. A improvisación e o humor son as chaves coas cales abre as portas ó seu máximo universo de xogos e moito ritmo, ademais de combinar a destreza e espontaneidade co clown e os malabares.
Ámbalas actividades transcorrerán a partir das 20.00 horas, no Cantón da Leña. As prazas cubriranse por orde de chegada ata cubrir a cabida. A dita programación está organizada pola Concellaría da Cultura da Pobra do Caramiñal, da cal é titular a edil Patricia Lojo (PSdeG-PSOE), en colaboración coa Rede Cultural da Deputación da Coruña.
