O Concello de Boiro traballa pola mellora da eficiencia na xestión dos recursos hídricos. A Xunta de Goberno local, na sesión celebrada esta mañá, aprobou a adxudicación do contrato menor para a adquisición e instalación de
dispositivos de medición de caudal, unha actuación que se vai levar a cabo mediante unha subvención da Xunta de Galicia.
A Consellería de Infraestruturas e Mobilidade vén de conceder ao Concello de Boiro unha subvención destinada á adquisición e instalación de dispositivos de medición do caudal captado en sistemas de abastecemento de
titularidade local. O obxectivo destas actuacións é contribuír a que as entidades xestionen os recursos hídricos coa maior dilixencia, eficacia e eficiencia posibles.
O Concello de Boiro traballa para continuar na súa loita a prol do consumo responsable de auga, a corrección de perdas, as conexións ilegais e a mellora do mantemento e rede de abastecemento. Coa adquisición de caudalímetros vaise conseguir medir especificamente a entrada e saída de auga para así poder detectar posibles fugas e garantir a prestación adecuada nos servizos de abastecemento de auga.
Os caudalímetros vanse instalar na estación de tratamento de auga potable (ETAP) e na saída dos depósitos de auga municipais para controlar o seu caudal e evitar fugas, obtendo un maior control no consumo de auga, cuantificar con exactitude as perdas na rede de auga municipal e poder solucionalas con axilidade e maior eficacia.
