Logo do Festival Turbina, a axenda cultural de Boiro mantén o listón ben alto esta segunda semana de agosto, comezando coa actuación de Cé Orquestra en Abanqueiro, este mércores 11 de agosto ás 21.00 horas a carón do Centro Social. Cé Orquestra, para quen non o saiba, é o nome baixo o que se agocha César Freiria, músico autodidacta e apaixonado dos instrumentos musicais, dominando á perfección un amplo abano deles, tal e como ten demostrado co seu proxecto Cé Orquestra Pantasma. A capacidade será limitada. Quen queira reservar entradas pode facelo en www.boiro.gal.
Xa na fin de semana, o venres 13 está previsto un concerto de Andrea & The Black Cats. Será na praza da Terceira Idade de Boiro, ás 22.00 horas. Unha vez máis, haberá que facer reserva na web municipal (as prazas son limitadas). Andrea & The Black Cats é un trío musical de Compostela que domina á perfección os estilos vencellados ao blues ao jazz de Nova Orleans e a gran tradición de música negra do sur dos Estados Unidos.
Ao día seguinte, o sábado 14, no marco da Feira Eco-lóxica de Boiro (praza da Terceira Idade), celebrarase un contacontos para público infantil (a partir de tres anos) a cargo de Xarope Tulú. Trátase do espectáculo Estrafalaria, unha proposta que combina a narración oral coa manipulación de obxectos, onde o público participa activamente do relato (os personaxes que interveñen na historia caracterízanse pola súa peculiaridade e levan a diferenza como bandeira). De novo o aforo é limitado e cómpre reservar entrada na web municipal, www.boiro.gal
Sen saírnos do sábado 14, o Campo de San Roque en Cespón vai acoller a partir das 20.00 horas unha nova edición do Serán Abeloura, centrado na música e na cultura popular e tradicional galega. Inclúe o quinto Encontro Tradicional de San Roque co grupo de pandeiretas de Abeloura, Rianxeiras da Covecha; Os centenarios; Os liantes; e Arredores. A capacidade é limitada. Cómpre reservar entradas na páxina de Facebook de Abeloura Grupo.
Na mesma xornada, sábado 14, a praza de Galicia acollerá o espectáculo musical A fiestra dos soños de Trotaventos, dirixido ao público infantil e familiar. A fiestra dos soños é un libro de poemas ilustrados e musicados editado por Galaxia. A parte literaria componse de trece poemas cunha temática que supón un canto á natureza. Deste traballo resulta un espectáculo musical en forma de concerto para o público miúdo. O autor é Manolo Boquete e a voz de Nadia Fonseca. Estarán acompañados dos músicos Ramón Feáns, Roberto Grandal e Dani Riveiro. Novamente será preciso reservar entrada en www.boiro.gal, xa que o aforo é limitado.
