Encadrada nos actos conmemorativos do Día das Letras Galegas 2021, adicado á poeta Xela Arias, a mostra Asinamos ser libres vai recalar en Boiro, na Casa da Cultura, o día 8 de novembro, tendo as súas portas abertas até o 28 do mesmo mes.
Trátase dunha exposición promovida pola Xunta, a través da Secretaría Xeral de Política Lingüística, que vai percorrer once localidades galegas comezando na Biblioteca Pública Ánxel Casal, con paradas en concellos da Rede de Dinamización Lingüística e en bibliotecas da Rede de Bibliotecas Públicas de Galicia, para difundir a figura, a vida, a obra e o contexto histórico que lle tocou vivir a Xela Arias.
Coordinada por María Xesús Nogueira, autora dos textos, e producida por Ouvirmos S.L., a mostra conta con fotografías de Xulio Gil, do Arquivo familiar Arias Castaño e do Arquivo Edicións Xerais de Galicia.
A través dos seus 12 paneis, que poden verse tamén en liña, o visitante coñecerá a infancia de Xela Arias, a súa adolescencia rebelde, os seus primeiros textos poéticos, a conexión da súa poesía coa cultura e a sociedade do seu tempo (a literatura, a música, a fotografía, o activismo político…), o seu labor como tradutora, a experiencia da maternidade plasmada en Darío a diario, o seu último poemario Intempériome, o seu pasamento repentino e o seu legado.
A mostra pode verse estes días en Outes, na Casa da Cultura, entre o 13 de agosto e o 2 de setembro.
A recalada en Boiro é a penúltima das paradas. A continuación, rematará o seu periplo na Fundación Curros Enríquez – Casa dos Poetas de Celanova (Ourense), entre o 29 de novembro e o 17 de decembro.
