Estes días (por quinto ano consecutivo) está a desenvolverse nos Xardíns de Valle-Inclán o mercadiño de actividades e produtos artesanais A nosa feira, unha iniciativa posta en marcha dende a Concellaría da Promoción Económica da Pobra do Caramiñal.
Tal e como explicou a edil Charo Varela (Nós Pobra), trátase dunha actividade “segura, ao aire libre e que permite a distancia social” cuxa finalidade radica en apoiar o sector do comercio, neste caso, o itinerante.
Nas súas palabras, “constitúe un atractivo turístico máis que busca tamén redundar positivamente noutros sectores como, por exemplo, o da hostalaría e os propios establecementos do municipio”. Neste senso, a concelleira valorou “positivamente” a afluencia de xente, “con maior volume que noutras edicións”. Tamén fixo saber que a actividade rematará o 31 de agosto “despois de ficar aberta dende finais de xullo”.
O mercadiño consta de dezaoito postos nos que se venden diversos produtos: téxtil, calzado, artesanía, xoiaría ou alimentación, entre outros. Ademais, o Concello contribuíu cunha caseta de seu, poñéndoo a disposición (gratuitamente) do comercio local pobrense.
Doutra banda, a titular da Promoción Económica fixo balance do mercado mariñeiro que se situou na praza Alcalde Segundo Durán do 19 ao 22 de agosto, enmarcado na programación da Semana do Mar, e que resultou “todo un éxito”.
