Doqui, a foca gris que estivo os días pasados en Corrubedo, na praia de Robeiriña facendo un alto no seu percorrido pola costa galega, é motivo de preocupación para a Coordinadora para o Estudo de Mamíferos Mariños (CEMMA), quen comprobou estes días que se está a achegar a zonas máis poboadas das Rías Baixas (viaxa de norte a sur) e, por esta razón, pódense xerar situacións de risco que cómpre evitar. A plataforma ambiental mariña deu unha serie de recomendacións sobre o que debemos e o que non debemos facer se albiscamos a Doqui (exemplar de lobo mariño cincento de máis de noventa quilos) nalgún dos nosos areais. Segundo o CEMMA, estes días foi visto en varias zonas da ría de Vigo.
Trátase dunha femia de aproximadamente dous anos de idade, neste momento ten un tamaño de case dous metros e pesa entre 90-100 kg. Habitualmente bota tempadas en mar aberto sen ser localizada que logo alterna con visitas á costa onde adoita saír descansar e durmir nas rochas. Foi en Caión onde, no verán pasado, a nomearon como Doqui.
Que facer
Diante da presenza do lobo mariño o único que hai que facer é avisar a 112 ou ao teléfono de coordinación da Rede de Varamentos 686 989 008, para que rexistren o lugar onde se atopa, e nada máis, “deixala o máis tranquila posíbel”, sinala o CEMMA, confirmando que estes días confirmouse (como no caso do golfiño da praia de Ornanda) o acoso dos bañistas, xente que lle quería dar de comer, botarlle auga e mesmo que a expulsaron do areal.
Que non facer
Pensar que está enferma ou ferida, agás que se observen feridas abertas ou mancaduras graves. Non tocala baixo ningunha circunstancia. A coordinadora lembra que os lobos mariños son agresivos en distancias curtas e presentan unha boa defensa de dentes na boca e poden magoar. Tamén se debe evitar levar os canso soltos na praia e no litoral.
Educación ambiental
Segundo o CEMMA, “para evitar esta problemática o máis importante é a divulgación e a educación ambiental, da presenza do lobo mariño e das boas actuacións que hai que ter diante del. Só dende unha posición de respecto pode darse un achegamento ao medio mariño e á convivencia coa fauna salvaxe. As situacións máis acuciantes deben ser postas en mans das forzas da orde e denunciadas, entre elas a persecución e o acoso, polo que se recomenda a denuncia na Policía Local, ou Guardia Civil (062) directamente”.
