Esta semana, o luns 28, celebrouse no Consistorio de Noia a recepción oficial ao Noia Club de Fútbol polo seu título ligueiro e o seu traballo ascenso de categoría (o CF Noia proclamouse campión de liga na Rexional Preferente, grupo norte, polo que sube, a vindeira tempada, a Terceira División).
No acto estiveron presentes o alcalde noiés, Santiago Freire, a concelleira de Deportes, Laura Salgado, e os concelleiros Ana García, Martín Fernández, Bea Rosende, Ricardo Suárez, Lola Caramés e Roberto Iglesias.
O presidente do CF Noia Jose Botana e máis a totalidade do equipo deixaron a súa sinatura no libro de honra do Concello. Tanto o rexedor como a concelleira de Deportes, nas súas intervencións, felicitaron ao equipo polo seu importante traballo e polas dificultades que tivo que salvar nun ano marcado pola pandemia e desexáronlle a mellor das sortes na nova etapa en Terceira División.
