O Concello de Rianxo vén de informar nas súas redes sociais de que se están a levar a cabo tarefas de urxencia, na contorna da ponte da autovía de Taragoña, para salvar a vida dunha manda de golfiños que ficaron varados nas augas desta parroquia tralo devalo da marea.
No dispositivo están a traballar axentes da Policía Local e membros da Brigada de Obras, de Protección Civil de Rianxo e máis da Confraría local, supervisados e axudados por unha técnica do CEMMA, a plataforma galega para a atención e o estudo de mamíferos mariños.
Trátase de catro exemplares que cruzaron boa parte da ría desde Palmeira e que, segundo indican as persoas que están a colaborar no salvamento, semellan estar en boas condicións á espera de que a suba da maré facilite os seus movementos. Sumouse aos traballos a zodiac de Protección Civil.
A Policía Local está a informar no seu Facebook do desenvolvemento dos traballos.
