O Concello de Porto do Son vai organizar en agosto unha formación presencial para mostrar á cidadanía as vantaxes de emprender en cooperativa e os mecanismos axeitados para facelo. O curso desenvolverase entre os días 3 e 6 de agosto, e serán 20 horas de contidos, en horario de 9.30 a 14.30 horas.
O obradoiro vai dirixido a persoas en risco de exclusión social interesadas neste tipo de iniciativas (desempregadas ou en activo).
Aprenderáselles o modelo cooperativo, as condicións e pasos para poñer en marcha unha empresa baixo esta fórmula colectiva, as portas nas que petar para beneficiárense de axudas e apoios e as diferentes metodoloxías das que botar man para asegurárense o éxito nas súas propostas (mostraranse exemplos concretos de cooperativas rendíbeis e competitivas).
As inscricións deberán facerse no servizo de Orientación Laboral do Concello de Porto do Son, no teléfono 981 86 74 12 ou ben a través do correo jose.pazo@portodoson.gal.