A agrupación Partido Barbanza Independente (PBBI), a través do seu concelleiro Vicente Mariño de Bricio, presentou unha moción relativa ao CEIPP de Palmeira e as reclamacións efectuadas pola súa comunidade (nais, pais e corpo docente) para que non se supriman dúas aulas de Infantil no dito centro. O partido mostrou o seu apoio ao CEIPP nesta reclamación e amosou “o seu rexeitamento á supresión das aulas acordada pola Consellería de Educación”.
A formación entende que “eliminar no último día e sen previo aviso suprimindo dúas aulas na etapa de Educación Infantil demostra que o departamento que dirixe Román Rodríguez non está a apoiar unha educación pública de calidade”.
O PBBI apoia “a toda a familia educativa do CEIPP de Palmeira, no que, segundo lembran, veñen de ter lugar accións de protesta por parte dos pais e das nais, ás que se sumaron profesores, equipo directivo e persoal non docente do colexio de Palmeira.
A agrupación pide a implicación da Corporación de Ribeira na solución do problema “ante este abuso da Consellería de Educación” e critica as consecuencias que terían estes recursos nos centros, “que obrigarán a ter menos protexidas as aulas e máis inseguros aos alumnos fronte á epidemia do coronavirus no próximo curso académico”.
Por iso, o PBBI solicita que todos os grupos políticos de Ribeira asinen un manifesto de apoio aos pais e docentes do colexio plurilingüe de Palmeira.
