O Concello de Outes presenta o cartel das festas patronais 2021. As actividades e concertos comezarán hoxe, venres 23, e rematarán o sábado 31 de xullo. Haberá dende concertos musicais, misas e alboradas ata monólogos ou espectáculos para o público infantil.
Abrirán a programación a Escola de Música e de Baile Tradicional de Outes, ás 21:00 horas na Horta do Muíño (A Serra), e máis o dúo noiés Monoulious Dop, ás 22.30 horas no mesmo escenario, aínda que este ano destacan actuacións como a do grupo Los Mecánicos o domingo 25 ou a dos vigueses Broken Peach (o venres 30 ás 22.30 horas na Horta do Muíño), ou a realización do monólogo Humor Salvaxe, de Pepo Suevos, que se levará a cabo o sábado 24 na Horta do Muíño (para maiores de 13 anos).
Tamén destaca o colofón das festas, que virá a cargo de Xabier Díaz e as Adufeiras de Salistre, o día 31 de xullo ás 22.30 horas na Horta do Muíño (A Serra), presentando As catedrais silenciadas.
As persoas interesadas en acudir a algunha das actividades, deberán anotarse co seu nome e apelidos na Casa da Cultura da localidade ou a través do teléfono 981850950.