Grandes estreas na sexta edición do programa Titiriberia

O Festival Titiriberia, organizado pola Asociación Morreu o Demo coa colaboración do Concello de Rianxo e da Deputación da Coruña, celebrará a súa sexta edición en Rianxo entre os días 20 e 24 de xullo. O Titiriberia 2021 acollerá encontros nos que se realizarán gravacións e entrevistas para recoller os testemuños de persoas de idade que lembran a Barriga Verde e a outras familias de titiriteiros tradicionais con presenza na vila. A maiores, o programa contempla outras actividades como exposicións sobre os monicreques tradicionais, presentacións de libros, unha mesa redonda moderada ou actuacións con títeres.

O martes 20, arrincará o festival co espectáculo Dona Barriga Verde, da compañía galega Larraitz Producións Artísticas. Esta programación desafía as convencións de xénero ao converter o clásico personaxe da tradición titiriteira galega en muller. A peza, estará destinada a maiores de cinco anos.

Dúas grandes estreas

En primeiro lugar, o venres 23 de xullo, Indignati (Asociación Galega de Commedia dell’Arte), presentará o seu espectáculo Maldita Máscara, unha montaxe de Commedia dell’arte que mestura contos, música, acrobacia e máscara. Esta actuación terá lugar no Pazo do Rianxiño ás 20:30 horas. Na mesma liña, a segunda estrea será ás 21:00 horas no mesmo espazo e correrá a cargo da compañía Babaluva, que dará a coñecer a súa peza Feira de sementes.

O programa, que se vai celebrar en Araño, Isorna, Taragoña, Leiro, Asados e Rianxo, inclúe outras grandes citas, como é o caso da xa celebre Varietés do Barriga Verde, un encontro escénico para o público adulto que reúne diferentes artistas nun espectáculo, conducido por Iria Pinheiro, que combina o cabaré, o teatro, os monicreques e a música. Este evento celebrarase no Patio do CEIP ADR Castelao o 23 de xullo ás 23:00 horas e contarán coa participación de Larraitz Urruzola, Títeres Alakrán, Rafa Rey, Tero Rodríguez, Lucho Penabade e Malala.

Ademais, a música correrá a cargo dun cuarteto da Escola de Música de Rianxo. Nesta actuación presentarase o libro República Sideral, da dramaturga local Esther Carrodeguas.

A entrada realizarase baixo reserva e toda as incidencias ou variacións que se poidan producir actualizaranse a través da páxina do Concello de Rianxo.