Galbán e Touriñán recalan esta fin de semana en Rianxo coa súa comedia Tempos modernos

O espectáculo de humor Tempos Modernos chega esta fin de semana a Rianxo. En concreto, representarase este sábado, 31 de xullo, ás 21:00 horas, no exterior do CEIP Castelao. O espectáculo virá da man dos actores, narradores e humoristas Duarte Galbán e Xosé Antonio Touriñan.

Para máis información, os interesados poden comprobar a páxina de Facebook do Concello.

Tamén poden visitar a web ataquilla.com, co fin de adquirir as entradas.

Tempos Modernos é “un espazo de comedia salvaxe, actual, innovador e en galego que ameaza con romper esquemas nunha situación social nunca antes vivida”.

Contarase coa música en directo de Leite con Jalletas e o humor de Duarte Galbán e X.A. Touriñán, que traen o seu último repertorio para facer “a comedia que tanto precisamos”, avanzan.

Indo ao miolo do asunto, trátase dun show cómico pouco convencional que combina varios estilos de humor e moita retranca do país, nun espazo cultural que pretende chegar ao público de todas as idades.