Un condutor precisou ser trasladado logo de colidir contra un poste o vehículo no que circulaba pola estrada DP-1106, na parroquia de Abanqueiro, en Boiro.
Foi un particular quen, pasadas as dez e cuarto da noite, se puxo en contacto co 112 Galicia para informar dun accidente no que un vehículo batera contra un poste da luz. Nesa mesma comunicación, o alertante afirmaba que se vían lapas por debaixo do turismo e que había unha persoa ferida.
Nada máis ter constancia dos feitos, dende o CIAE-112 deuse aviso ao Servizo de Urxencias Sanitarias de Galicia – 061 e aos Bombeiros de Boiro, así como á Garda Civil de Tráfico, á Policía Local e ao Servizo Municipal de Protección Civil. Ademais, xa que debido ao impacto un poste da subministración eléctrica resultou afectado, os xestores do 112 informaron da situación á empresa que abastece a zona.
Xa no lugar do sinistro, os Bombeiros confirmaron que o vehículo partira o poste e que o alumeado caera no medio da estrada, polo que a circulación tivo que ser cortada, cando menos nun carril.
Por último, os servizos de emerxencias comunicaron que a persoa implicada no sinistro fora trasladada ao centro hospitalario de referencia.