En Ribeira inaugurada a exposición Momentos para a creatividade do boirense Joaquín Cortés Laíño

A inauguración da exposición Momentos para a creatividade de Joaquín Cortés Laíño, celebrada o pasado venres, suscitou unha gran expectativa ata o punto de completar o máximo do aforo permitido na apertura da mostra. Así, medio cento de persoas acudiron ata as instalacións do Centro Cultural Lustres Rivas para contemplar unha proposta coa que se dá inicio á programación municipal da Fiestra da Cultura.
Membros da Corporación ribeirense, persoeiros culturais da zona como Manuel Ayaso, Manuel Cartea, Pastor Rodríguez ou Che Tembra e visitantes chegados de lugares situados fóra da comarca como Lugo, Santiago ou A Coruña, foron algúns dos que asistiron a un acto no que Joaquín Cortés, tamén presente, exhibe unha combinación de esculturas e pinturas que mesturan materiais como o ferro e a madeira, acrílicos, colaxes, materiais de refugallo ou, ata pezas dun piano baixo o título Momentos para a creatividade”.
A mostra permanecerá no Lustres Rivas ata o 31 de xullo e pode ser visitada de luns a venres de 10 a 14 horas e de 19 a 21 horas e os sábados de 11 a 14 horas.
Durante o acto inaugural, a concelleira de Cultura María Sampedro animou á veciñanza a contemplar esta fermosa exposición, sempre respectando os protocolos COVID.