O Concello de Boiro informou do comezo das obras para renovar os pavimentos e redes de servizo en Fonte do Mouro. Esta actuación lévase a cabo con cargo ao Plan de Obras e Servizos da Deputación da Coruña. O alcalde, José Ramón Romero, e o concelleiro de Urbanismo e Obras, Luis Ruiz, visitaron o lugar dos traballos.
A finalidade desta actuación é a mellora do firme nun tramo de rúa na aldea de Fonte do Mouro que na actualidade presentaba deficiencias no pavimento indicativas do seu deterioro e tamén deficiencias nas redes de captación de pluviais. O Concello engade que o pavimento existente requiría uns gastos excesivos de conservación e, debido á inexistencia de captación de pluviais, producíanse grandes escorrentías de auga.
Estase a levar a cabo unha rehabilitación superficial para conservar e mellorar as características funcionais de seguridade, e comodidade así como a protección do conxunto do firme e a instalación dunha rede de pluviais. Vaise actuar nun tramo duns 780 metros de lonxitude cunha superficie duns 4.900 metros cadrados.