O secretario xeral da Emigración, Antonio Rodríguez Miranda, presentou este 1 de xullo a través do servizo Facebook Live o novo portal que este departamento autonómico vén de poñer en funcionamento na súa web Galiciaaberta e no que os residentes no exterior e retornados poden consultar información tributaria relativa aos seus países de residencia en relación con España.
En total, é posíbel consultar esta información nos 11 países con maior número de residentes de orixe galego en Europa, e posteriormente, ampliarase cos países con maior colectividade galega en América.
A Secretaría Xeral da Emigración ofrece a través deste portal unha serie de informacións básicas para aclarar as cuestións básicas vinculadas á tributación das rendas obtidas por persoas físicas que teñan a condición de galegos/as retornados/as ou de galegos/as no exterior.
Asemade, a través dunha serie de ligazóns orientarase de xeito sinxelo e visual sobre as regras xerais existentes en relación aos principais criterios previstos para cada tipo de renda segundo os países, centrándoos nas persoas físicas.
