Este 20 de xuño celebrouse na Coruña o acto de benvida das alumnas e alumnos axentes que se incorporan en réxime de prácticas ás comisarías que ten a Policía Nacional na provincia, catro dos cales (dun total de 49, sendo 108 os de toda Galicia) desenvolverán o seu labor nas dependencias de Ribeira. No acto participaron o xefe superior de Policía de Galicia, José Luis Barreiro, e a subdelegada do Goberno na Coruña, María Rivas, quen destacou “a importancia da formación das Forzas e Corpos de Seguridade do Estado para garantir a seguridade cidadá”.
Rivas lembrou ás alumnas e alumnos que “agora se enfrontan aos novos retos que demanda a sociedade e que cada vez son máis diversos e variados”, citando entre eles a loita contra a violencia de xénero, contra os delitos relacionados coas novas tecnoloxías e coa propia seguridade das persoas, ademais de tarefas como a protección do Camiño de Santiago e dos peregrinos.
Na súa intervención, a subdelegada do Goberno pediu aos axentes un compromiso cos coruñeses e coruñesas, así como cos visitantes que nos próximos meses visiten as súas localidades de destino.
Dos 108 policías, 49 farán as prácticas nas comisarías da Policía Nacional na provincia da Coruña. Concretamente, 16 na comisaria da Coruña, 20 na comisaría de Santiago, 9 na comisaría de Narón-Ferrol e 4 na comisaría de Ribeira. Dos 49 axentes, quince son mulleres.
