A Xunta adxudicou as obras de acondicionamento do firme na estrada AC-550 en Muros, que comezarán nas vindeiras semanas.
A intervención, adxudicada á empresa MICROASFALT SLU por preto de 32.000 euros, ten un prazo de execución dun mes.
Os traballos, que se desenvolverán no treito comprendido entre os puntos quilométricos 34+000 e 35+150, teñen como obxectivo mellorar as características superficiais da calzada, nunha zona na que se teñen producido recentes saídas de vía.
Dado que o estado estrutural do firme é bo, cómpre mellorar as propiedades superficiais da estrada nese treito dotándoa dun maior rozamento transversal que favoreza a adherencia e a seguridade viaria.
A reparación da zona dálle continuidade ao traballo realizado nos últimos anos de mellora do firme entre os puntos quilométricos 35+150 e 35+500.
Para acadar este acondicionamento, estenderase unha capa de microaglomerado en frío nos carrís de circulación da estrada.
Esta actuación súmase a outra adxudicada esta semana na mesma estrada, na travesía de Esteiro, cuxos traballos comezarán en breve.
A Consellería de Infraestruturas e Mobilidade continúa traballando na conservación e mantemento da rede viaria autonómica coa fin de reforzar a seguridade e a comodidade dos usuarios.
