O vindeiro domingo 11 de xullo, a Xanela do Maxín presenta en Rianxo o seu espectáculo A gárgola do Mestre Mateo, en colaboración coa asociación rianxeira Fogo Fatuo. Será ás 11.30 horas no patio do CEIP Castelao.
Segundo avanzan dende A Xanela do Maxín, A Gárgola do Mestre Mateo é unha versión da obra A viaxe de Saira da mesma agrupación e concíbese como un convite ao público familiar para gozar do teatro a través “do vínculo coa música tradicional, nun espectáculo profesional multidisciplinar”. Tamén é un convite ás agrupacións de música tradicional e folclore local, para que participen (como no caso de Fogo Fatuo) coas súa danzas e música, pero tamén cos traxes tradicionais, “convertendo este espectáculo nun escaparate que dignifica e pon en valor a riqueza de tecidos, traxes, bordados, encaixes e adobíos; imprescindíbel patrimonio material e etnográfico galego”.
