A sexta edición de Titiriberia leva os mellores espectáculos de monicreques ás parroquias de Rianxo

Os responsábeis da Asociación Cultural Morreu o Demo e do Proxecto Barriga Verde estiveron estes días no Consistorio de Rianxo para avanzar algúns detalles da sexta edición do Festival Titiriberia, organizado co apoio de Cultura da Deputación da Coruña e do Concello de Rianxo, e inserido na programación municipal de actividades de verán. Segundo se fixo saber, a nova edición rianxeira do certame internacional de monicreques tradicionais vaise celebrar entre os días 20 e 24 de xullo. Será un programa de espectáculos diverso e, sobre todo, descentralizado, con presenza en moi diferentes localizacións do territorio rianxeiro. O festival celebrarase baixo un epígrafe que é unha homenaxe á vila que o acolleu: Cachiporras de pau de laranxo!

Moitos dos detalles da nova convocatoria xa se poden consultar na web titiriberia.com.

As sesións comezarán o mates 20 da man de Dona Barriga Verde (ás 12 en Campo Maneiro, en Taragoña, e ás 21.00 no Centro Cultural Vicente Vidal de Leiro) e proseguirán ao día seguinte, 21 de xullo, con O Cego dos Monifates (ás 11.00 horas no mercado da praza Castelao), Sidulfo e o diaño (ás 12.00 no Campo do Souto de Isorna) e as Varietés do animalario (ás 21.000 no Centro Sociocultural A Capela do Araño).

O xoves será a quenda de O día em que a morte sambou (ás 12.00 no Auditorio de Rianxo) e de Títeres e medios (mesa redonda, ás 20.00 horas no Pazo de Rianxo. O venres 23 desenvolveranse os espectáculos Vacacións no mar (ás 12.00 no Parque de Santa Lucía en Asados), Maldita Máscara (ás 20.30 no Pazo de Rianxiño) e Varietés (música e actuacións, no patio do CEIP Castelao ás 23.00). O sábado será a quenda de Retrocuentos (ás 12.00 horas no Auditorio de Rianxo) e da Feira das Sementes (ás 21.00 horas no Pazo de Rianxiño). Os diferentes espectáculos complementaranse con exposicións e obradoiros de monicreques e de teatro de máscaras para a rapazada.