A Ecobrigada de Amicos libera de residuos contaminantes as praias de Porto do Son

A Ecobrigada de Asociación Amicos comezou a recollida de residuos mariños dos areais de Porto do Son para a súa posta a punto para o verán. Segundo informaron os integrantes do equipo de limpeza e protección ecolóxica, está previsto actuar na totalidade de praias no concello, empezando pola praia de Ornanda ou Gaivotas e percorrendo toda a liña de costa ata chegar ao concello de Ribeira, abranguendo os areais de Aguieira, Caveiro, Fonforrón, Suigrexa, Arnela, Baroña, Queiruga e Coira.

O encomiábel e meritorio traballo da Ecobrigada tradúcese en importantes cantidades de refugallos apañados, un traballo que ten o valor engadido de evitar a súa degradación no medio mariño. Estas son as cifras que manexan: unha media duns 75 quilogramos de residuos por día, un total de case 300 kg.

Ademais de recoller os residuos, a Ecobrigada encárgase de identificar os materiais apañados, clasificalos e pesalos, polo que ata o momento, retiráronse das praias de Porto do Son un total de 197 kg de plástico, 8 kg de vidro, 2 kg de papel e 83 kg de mistura de restos. A previsión é que cando rematen os labores de limpeza, este venres, o total de residuos mariños retirados das praias sexa duns 450 quilogramos.

“O que estamos recollendo maioritariamente son envases de plástico e redes” indica Daniel Ares,

capataz da Ecobrigada encargada da limpeza. Indica que “malia todo”, ve que a xente cada vez está máis concienciada con non tirar lixo nos areais: “Na praia de Baroña, unha turista inglesa achegouse para indicarnos onde atopara máis plásticos para que pasáramos a recollelos”, explicaba Daniel.

A brigada encargada desta actuación está constituída por un capataz e tres operarios con discapacidade intelectual en risco de exclusión social. Esta acción, financiada polo Concello de Porto do Son, está en liña coa política ambiental de Amicos e abéirase ás accións desenvolvidas dentro do proxecto RE-MAR, promovido por Amicos e financiado pola Fundación Biodiversidade dentro do programa Preamar e financiado por fondos FEMP. Este proxecto ten como obxectivo a redución de lixos mariños a través das persoas con diversidades cognitivas e funcionais, favorecendo a implicación directa das institucións, os traballadores do mar e a poboación en xeral.