Cadrando co primeiro día de verán, o Concello informou da apertura de dúas contas específicas nas populares redes sociais Facebook e Instagram sobre o Turismo de Ribeira. O Goberno local sinala que con estas dúas novas canles de comunicación online “o obxectivo é contribuír á promoción e divulgación dos moitos recursos que atesoura este municipio barbanzán dende o punto de vista ambiental, patrimonial, cultural, gastronómico ou de lecer”.
Outra das finalidades é dar a coñecer unha oferta que transcende o período estival e “que fai de Ribeira un destino a ter en conta en todas as estacións do ano”, explica o Concello.
