O Grupo Municipal Socialista de Noia rexistrou para o seu debate no pleno ordinario do xoves unha moción para a instalación de puntos de recarga de vehículos eléctricos. Os socialistas consideran que a protección do medio ambiente en xeral, e particularmente a redución da utilización de combustíbeis fósiles, “debe ser unha das prioridades das administracións públicas”, poñendo “en funcionamento as medidas axeitadas para reducir o uso de maneira directa de vehículos contaminantes, e fomentando a súa renovación por outros máis limpos”.
O PSdG-PSOE indica que “unha das dificultades que están a ter as persoas usuarias de vehículos eléctricos en Galicia son os poucos puntos de recarga que hai ao longo da nosa xeografía, impedindo unha mobilidade máis libre e converténdose nun verdadeiro freo para as persoas que están pensando en adquirir este tipo de vehículos”.
O voceiro Roberto Iglesias, incide en que “a instalación de puntos de recarga, ademais de ofrecer un servizo á cidadanía de Noia, pode axudar a atraer visitantes”. Deste xeito, indica, “Noia aparecería no mapa de puntos de recarga nacional, e os visitantes mentres deixan o seu vehículo no punto correspondente poden facer uso do noso comercio ou hostalería, situándonos en vantaxe respecto a outras localidades veciñas”
Así mesmo “para facer da vila de Noia unha vila comprometida coa redución da contaminación”, os socialistas propoñen na moción presentada medidas para para fomentar o uso da bicicleta ao realizar desprazamentos curtos como ir a traballar, recados ou simplemente facer deporte, como por exemplo “a instalación dalgún punto de reparación de bicicletas na vía pública, para axudar aos usuarios que utilizan este medio de transporte e poidan sufrir unha avaría”.
