Finalmente chegaron ao seu remate en Ribeira as charlas do ciclo Arte e Palabra, celebradas no Centro Cultural Lustres Rivas. Concluíron cunha disertación sobre a obra e as contribucións da escultura noiesa Soledad Penalta a cargo do profesor Juan Manuel Monterroso Montero.
A cita serviu tamén para dar remate á exposición Cinco artistas do Barbanza, que exhibiu dende o pasado mes de abril esta instalación cultural de Ribeira.
Monterroso Montero salientou “a traxectoria dunha escultora que rompeu moldes ao dedicarse a unha disciplina artística que, nos seus inicios, era un mundo de homes, traballando ademais un material que non se deixa domar facilmente”.
Mostra de Plácido Amboage
Tras esta iniciativa promovida pola Concellería de Cultura de Ribeira en colaboración coa Asociación Barbantia e a Fundación Museo de Artes, este venres ás 21 horas terá lugar no mesmo emprazamento a inauguración da mostra Estampas de Compostela, de Plácido Amboage. As persoas interesadas en asistir poden inscribirse enviando un email a culturaefestexos@ribeira.gal.
