O Concello de Boiro realizou unha nova sesión da Comisión de Valoración e Planificación do futuro do Pazo de Goiáns, co fin de determinar os posíbeis usos do histórico edificio e a súa contorna unha vez rematen as obras de rehabilitación da edificación principal que se están a levar a cabo, que xa están na rúa recta final.
Na reunión, que se realiza de xeito periódico, participaron o alcalde, José Ramón Romero e o concelleiro de Patrimonio, Raúl Treus, así como expertos dos ámbitos arquitectónico, paisaxístico, turístico, cultural ou medioambiental.
Na sesión lembrouse que actualmente estase a traballar no andar superior do inmóbel, onde xa se colocou a madeira e está pendente o vernizado. En canto aos acabados finais de carpintería, está previsto que as obras rematen no mes de xullo.
A Comisión engadiu que “aínda que non está determinado cal é o uso concreto e definitivo que se lle vai dar ao interior do pazo”, decidiuse “que unha vez conclúan as obras organizaranse visitas guiadas de grupos reducidos.
A maiores, estanse a realizar traballos nos xardíns. Os expertos que compoñen a comisión determinaron a importancia de delimitar ben as distintas zonas que compoñen a finca para manter e coidar as moitas especies singulares que hai no espazo, así como xerar itinerarios de visita.
