O día 7 abre en Lousame o prazo de inscricións para o programa de conciliación estival

O Concello de Lousame manterá aberto dende o luns 7 de xuño ata o 10 do mesmo mes o prazo de inscrición no programa Lousame Concilia. Ludoteca de Verán 2021, unha iniciativa para facilitar o día a día das familias en tempo de vacacións que está programada para os meses de xullo e agosto.

Participantes da actividade de conciliación realizada en Lousame esta Semana Santa

A Ludoteca de Verán está dirixida a nenos e nenas de entre 3 e 12 anos de idade, que desfrutarán de actividades lúdicas, participativas e creativas nas instalacións do CPI Cernadas de Castro, en horario de 9:30 a 14:30 horas. As inscricións deben realizarse no Rexistro Municipal e o número de prazas vaise adaptar aos límites establecidos na normativa vixente fronte á COVID-19.

A concelleira de Servizos Sociais, Silvia Agrafojo, explica que “dende o Concello de Lousame somos conscientes da necesidade de seguir mantendo as iniciativas de conciliación da vida familiar e laboral, polo que tendo en conta todas as medidas de seguridade da COVID-19, un ano máis presentamos este programa. Ao longo do tempo, a iniciativa veuse consolidando a través dunha ampla demanda por parte das familias”.

Os prezos non varían con respecto a anos anteriores. No caso das familias que opten pola inscrición para todo o verán, o prezo será de 15 euros/mes. Para anotarse só terán que descargar e cumprimentar a solicitude correspondente, que poden recoller nos Servizos Sociais de Lousame ou descargar na web municipal. Ademais de presentar a última nómina ou recibo de autónomos (para acreditar a situación laboral e ingresos) e a certificación bancaria orixinal do número de conta (no caso de menores que este curso non asistiran a ningún servizo do Lousame Concilia), tamén será necesario presentar declaración xurada de residencia efectiva e acreditábel en Lousame e certificado de monoparentalidade emitido pola Xunta de Galicia, de ser o caso.

No caso das familias interesadas en que o seu fillo ou filla participe en días soltos, só terán que chamar ao teléfono 616 345 812, sempre e cando haxa prazas libres. Neste caso, o prezo é de 2,5 euros por día. Máis información nos Servizos Sociais de Lousame ou nos teléfonos 981 820 494 e 689 126 385.