O BNG de Ribeira trasladará ao pleno do Concello as peticións da veciñanza de Palmeira recollida sobre Internet, estradas e reciclaxe, segundo informaron os membros da formación, Xosé Vázquez, Luís Pérez e Cruz Rivadulla.
Así, o voceiro nacionalista, Xosé Vázquez, considera que para fixar poboación no rural, “desde as administración públicas débense realizar os investimentos necesarios e na parroquia de Palmeira hai carencia e inconvenientes que cómpre atallar”. Así, o BNG fai fincapé na necesidade de “mellorar o acceso a Internet que garanta unha boa conexión, sobre todo nun contexto no que cada vez está máis presente a educación a distancia ou o teletraballo”.
Outra das queixas trasladadas será a dotación de sumidoiro que recollan as augas da chuvia e unha nova pavimentación que precisan varias zonas estradas na Insuela. Ademais, a veciñanza reclama un mellor mantemento dos parques e un mellor tratamento de residuos coa incorporación de máis contedores de reciclaxe.
Deste xeito, o BNG trasladará ao pleno as seguintes necesidades:
- Inclusión por parte do Concello de Ribeira partidas orzamentarias para a dotación de recollida e augas pluviais.
- Mellorar o mantemento de parques e cunetas.
- Instalar contedores de reciclaxe e contedores de aceite.
- Instar ás empresas de telefonía a mellorar a conexión á rede.
