O BNG fará unha recollida de sinaturas en Ribeira contra a subida de luz

O BNG ribeirense vén de anunciar a posta en marcha dunha recollida de sinaturas contra a subida da luz o vindeiro sábado 26 de xuño na avenida do Malecón. Esta iniciativa nace debido ás graves consecuencias que pode ocasionar sobre as familiar e sobre as pequenas e medianas empresas en plena crise da COVID-19.

Desde a formación nacionalista apuntan a que rebaixar a factura da luz é o maior incentivo fiscal que se pode ter para que se instalen empresas e se creen oportunidades en Galicia. “A subida da luz no caso concreto de Galicia é escandalosa, mesmo diría que unha aberración, porque somos grandes produtores de electricidade pero non temos ningún beneficio desa riqueza”, denunciou Pérez Barral.

Con esta campaña de recollida de sinaturas, o BNG reclama un prezo da luz máis baixo para todo os galegos e galegas, xa que é “unha cuestión clave”, argumentou o edil nacionalista. Para facer fronte a esta proposta, o BNG defende a intervención pública no sector enerxético e pon sobre a mesa medidas concretas e realizables se hai vontade política. A redución do IVE da luz ao 4% fronte ao 21%, unha tarifa eléctrica e por último a creación dunha empresa pública galega de enerxía son tres das claves para facer posible esta proposta, apuntan dende a sede nacionalista.