A Asociación de Empresarios de Ribeira e o Concello presentaron este xoves 3 de xuño, no local da entidade na rúa Rosalía de Castro, a nova edición dunha actividade directamente encamiñada a dinamizar a actividade comercial da cidade logo do duro revés dos prolongados meses de pandemia e restricións.
Trátase da Noite Aberta de Ribeira, que se celebra esta mesma finde, os días 4 e 5 de xuño, e cuxa nova edición vén con importantes descontos en máis de 30 establecementos. O horario dos locais participantes será ata as 21.00 horas no caso do venres e ata as 22.00 no caso do sábado.
Haberá, entre outras importantes actividades dirixidas a incrementar a pegada da Noite Aberta, un sorteo de tres fins de semana de lecer nun balneario para dúas persoas. Tamén se sortearán dúas viaxes en catamarán.
O programa de actividades foi dado a coñecer polo presidente da Asociación de Empresarios de Ribeira, Francisco Martínez, e o concelleiro de Comercio, Ramón Doval.
