Esta finde celébrase en Boiro o Campionato Galego por Equipos de Optimist

O Consistorio de Boiro acolleu este 9 de xuño a presentación do Campionato Galego por Equipos para clase Optimist, organizado pola Escola Náutico Deportiva de Boiro, o Club Náutico local e a Real Federación de Vela. A cita celebrarase os días 12 e 13 de xuño, na contorna do Club Náutico.

Na presentación participaron o concelleiro de Deportes Marcos Fajardo; o presidente da Federación Galega de Vela, Manuel Villaverde; o presidente do Club, Manuel Fajardo; o presidente da Escola Náutica, Ramón Ares; e a directora de relacións institucionais de JEALSA, Margarita Hermo.

Segundo fixeron saber, as probas de regatas vanse realizar por equipos e haberá premios para os tres primeiros equipos da clasificación xeral, así como un trofeo de Campión Galego por Equipos da RFGV. As probas comezan o sábado día 12 ás 12.00 horas, cando saia a primeira proba do día e o domingo comezarán ás 11.00 horas. A entrega dos premios farase o domingo a partir das 18.30 horas.

O alcalde e o concelleiro de Deportes agradeceron á Federación, ao Club Náutico e á Escola Náutica polo traballo que realizan para que Boiro sexa un referente no deporte da vela e mostraron o compromiso e aposta do Concello en potenciar o deporte base.