O complexo polideportivo da Fieiteira dará cabida entre o 16 e o 20 de agosto a un campus de verán de fútbol base organizado pola Fundación Celta: unha iniciativa dirixida a nenos e nenas de entre 4 e 16 anos coa fin de seguir impulsando a práctica deste deporte no municipio.
A iniciativa foi presentada pola concelleira de Deportes do Concello de Ribeira, Juana Brión; o director da Fundación, Germán Arteta; e o responsable das escolas deportivas desta entidade, Manu Gómez.
Xunto a eles estiveron os representantes de diversos clubs locais: Cidade de Ribeira, Xuventú de Aguiño e Atlético Oleiros.
Brión agradeceu á Fundación o poder contar novamente con esta iniciativa, froito do convenio asinado entre ambas institucións. Pola súa parte, Germán Arteta salientou a súa idoneidade para que o fútbol base siga medrando, en tanto que Manu Gómez afirmou que sería un éxito que acudiron rapaces de todos os clubs do municipio ou incluso nenos que nunca xogaron ao fútbol.
Inscricións
O prazo para inscribirse xa está aberto na páxina do Celta de Vigo: https://shop.rccelta.es/es/campus-ribeira.html. A data límite é o 11 de agosto. As clases desenvolveranse de 9.30 a 14 horas.
