O Concello de Lousame vén de anunciar a reapertura da súa piscina municipal o vindeiro 1 de xullo, así como os cursos de natación de verán que comezarán o día 5 de xullo. As prazas para este curso son limitadas e o período de preinscrición abrirase o 16 de xuño. A piscina permanecerá aberta ata o día 15 de setembro.
Os cursos da piscina organizaranse por franxas de idade con dúas quendas nas que haberá un máximo de seis rapaces, cun total de 12 prazas por cada grupo debido á COVID-19. Así, os nenos e nenas de 4 a 6 anos distribuiranse no grupo A os luns e mércores de 12:30 a 13:30 horas e no grupo B os martes e xoves no mesmo horario.
Doutra banda, a os grupos de 7 a 10 anos dividiranse nos mesmos días pero nas horas de 11:30 a 12:30. Pola súa parte, os maiores de 11 anos practicarán natación de 10:30 a 11:30 horas, tamén luns e mércores o grupo A, e martes e xoves o grupo B. Tódolos interesados en participar deberán tramitar a súa inscrición a través da concellaría de Deportes na Casa do Concello.
Ademais, o Concello informou que a piscina só estará aberta para os cursos de natación e pola tarde abrirá de 15:00 a 21:00 horas de luns a domingo, cun aforo total de 78 persoas segundo as medidas de seguridade establecidas polas autoridades sanitarias por mor da COVID-19.
