En Boiro Olloboi celebra esta fin de semana a edición 10+1 do Festival de cine escolar no parque da Cachada

O Concello de Boiro colabora coa celebración da edición 10+1 do Festival de cine escolar Olloboi que se vai celebrar este sábado 12 de xuño a partir das 19.30 horas no parque da Cachada. A concelleira de Cultura, María Outeiral; o técnico de cultura, Alberto García; e a presidenta da asociación, Ana Moreiras, presentaron esta mañá a programación e planificación do mesmo.
Nesta edición participaron 160 traballos de todo Galicia e os premios ás mellores pezas audiovisuais elaboradas nas escolas galegas vanse entregar este sábado. O mesmo día vaise proxectar o documental Cadernas de Olloboi,
que mostra e recolle o sentir dos once anos de festival.
Debido á situación sanitaria producida pola Covid-19 o festival non vai estar aberto ao público xeral, so asistirán como convidados os finalistas dos premios. Dende a organización mostráronse moi agradecidos con poder volver realizar o festival nunha situación difícil para a creación audiovisual e resaltaron o traballo e involucración da comunidade educativa pola calidade dos proxectos presentados.
A concelleira de Cultura, María Outeiral, falou da importancia que ten un festival destas características pola creación de sinerxías entre cultura e educación e resaltou a importancia que ten para o Concello que un festival das características de Olloboi se celebre en Boiro.