Un total de 40 nadadores de oito comunidades autónomas van afrontar o vindeiro 31 de xullo unha nova edición da Travesía ArousaMan, entre O Grove e Ribeira, no afán de dar visualización ao dano cerebral adquirido (DCA).
O evento foi presentado esta mañá no salón de plenos do consistorio nun acto que contou coa presenza e participación do alcalde Manuel Ruiz, a concelleira de Deportes Juana Brión; Manolo O Nacho,
vicepresidente da Asociación ArousaMan e afectado por DCA; Juan Ramón Martínez, organizador da cita; Julio Simarro, presidente do Club Natación Ribeira, que tamén colabora na organización; Concha Otero, vicepresidenta da asociación de dano cerebral Sarela; e Manolo Majo e María Gómez como nadadores nas edicións de 2019.
Dos 40 nadadores, tres son mulleres, dúas das cales nadarán sen neopreno (entre elas a propia María Gómez que repite experiencia).
Ademais de Galicia, están representadas as comunidades de País Vasco, Andalucía, Valencia, Asturias, Madrid, Castela A Mancha e Castela e León. A saída terá lugar dende a praia grovense de Confín ás dez da mañá (os participantes dividiranse en tres grupos) e estímase que tardarán arredor de seis horas en alcanzar a praia ribeirense de Coroso, que dista 13 kilómetros.
Todos os comparecentes salientaron a importancia de dar visibilidade a DCA: unha doenza que ninguén está exenta de sufrir e que se pode desencadenar por moitas causas: un ictus, un aneurisma, un accidente automobilístico ou un tumor cerebral, caso este último de Manolo O Nacho, a persoa que serviu de inspiración para emprender
esta iniciativa. Tamén padece DCA Manolo Majo, quen significou que a súa participación en 2019 axudoulle a mellorar tanto física como mentalmente.
Toda a recadación excluídos os gastos de organización irán destinados a prol deste labor de concienciación.
