O Concello de Boiro celebrou este luns 7 de xuño unha nova sesión da Comisión de Seguimento da Evolución da COVID-19 que se realiza de xeito semanal para coñecer a incidencia da pandemia no municipio e determinar as medidas a seguir para o control da situación epidemiolóxica. Segundo os novos niveis de restrición entrados en vigor hoxe, Boiro mantense no nivel medio pola súa incidencia tanto a 7 como a 14 días.
Na xuntanza tamén se debullou o labor recente do departamento de Servizos Sociais, que mantén o control para a coordinación das posíbeis necesidades derivadas dos casos positivos en COVID-19 como son a recollida de lixo ou entrega de alimentos e outros bens de primeira necesidade por parte de Protección Civil.
Amais, lembrouse que dende o departamento de Servizos Sociais do Concello de Boiro realízanse outros trámites derivados da COVID, sendo un deles a tramitación de Tarxetas Moedeiro de Cruz Vermella destinadas á adquisición de produtos de alimentación, hixiene ou farmacia para persoas en situación de vulnerabilidade, das que se levan tramitadas 123 dende que se puxo en funcionamento este servizo. Tamén se realizan os trámites para o servizo de teleasistencia da Deputación da Coruña e que, dende o inicio da pandemia, se tramitaron un total de 23 novas.
A Policía Local non tramitou novas sancións nos últimos días por incumprimento das medidas específicas para o control da situación epidemiolóxica.